Tuberkulozi po bëhet një nga shkaqet kryesore të vdekjeve në të gjithë botën dhe në Shqipëri situata është shumë serioze.

Alarmin e ka ngritur Organizata Botërore e shëndetit.

Sipas një raporti të fundit të Organizatës Botërore të Shëndetit, janë shtuar 10 milion raste të tuberkulozit vetëm vitin e shkuar, ndërsa humbën jetën  484 mijë njerëz përgjatë 2018-ës.

Lidhur me të dhënat e vitit 2018 për Shqipërinë, theksohet se ka pasur raste në rritje dhe se numri i të prekurve gjatë vitit të shkuar ishte plot 440.

Të dhënat tregojnë se 73% e të prekurve janë burra dhe 26 % janë gra.

Tuberkulozi është një sëmundje infektive ngjitëse e shkaktuar nga mykobakteri tuberkular, i cili në të kaluarën në gjuhën e përditshme njihej me emrin ‘’verem”. Zakonisht ky mikrob sulmon mushkëritë, por mund të prekë gjithashtu edhe organe të tjera të trupit të njeriut. Shumica e njerëzve të prekur nga infeksioni nuk zhvillojnë shenja klinike për një kohë të gjatë. Në këtë rast sëmundja cilësohet si tuberkulozi i fshehur. Nëse këta persona nuk zbulohen dhe nuk trajtohen, sëmundja merr karakter agresiv, e mund të çojë deri në pasoja fatale për jetën në rreth 50 për qind të personave të prekur.