Disa teori të ndryshme e lidhin përkeqësimin e shikimit të gruas me shtatzaninë, lindjen si edhe ushqyerjen me gji.
Por sa të vërteta janë këto?
• Shtatzania provokon një rritje të miopisë. Kjo nuk është absolutisht e vërtetë. Problemet me shikimin (miopia) janë të lindura dhe lidhen kryesisht me faktorin gjenetik.
• Çfarë ndodh gjatë ushqyerjes me gji? Nuk ndodh asgjë që përkeqëson shikimin e syve të gruas. Në të vërtetë të gjitha këto teori u përhapën rreth viteve 1950, kohë në të cilën gratë martoheshin dhe sillnin në jetë fëmijë në moshë më të hershme (rreth moshës 20 vjeçare), dhe kjo do të përkonte pikërisht me moshën në të cilën shpesh shfaqeshin për herë të parë problemet me shikimin. Sot gratë martohen dhe sjellin në jetë fëmijë në moshën 30 vjeçare, pra problemet me shikimin tashmë mund të jenë shfaqur.
• Mund të ndikojë lindja natyrale në përkeqësimin e shikimit të gruas? Kjo mund të ndodhë vetëm në disa raste të veçanta. Këto probleme zakonisht mund të shfaqen tek gratë me miopi të theksuar ( sytë me numër -10, -15), ose në raste të rralla edhe tek ato që kanë defekte në strukturën e retinës. Në këto raste mjeku mund të këshillojë për një lindje me operacion.
Gjatë shtatzanisë gruaja këshillohet të bëjë edhe një vizitë tek mjeku i syve, dhe kjo është e detyrueshme nëse ajo ka tashmë probleme me miopinë por edhe në rastet kur shfaqet diabeti gestacional (i shtatzanisë) si edhe toksoplazmoza. Këshillohet kështu pasi në të kundërt mund të krijohen probleme me retinën e syve.

Lexoni dhe: Çfarë tregojnë sytë për shëndetin? Në cilat raste duhet të shqetësohemi?