Seriali “Squid Games” është ndër më të ndjekurit e momentit, por edhe më të debatuarit e diskutuarit, jo vetëm në rrethin e audiencës por edhe të profesionistëve. Njerëz të fushës së medias, psikologjisë e tashmë edhe mjekësisë kanë opinionet e tyre lidhur me këtë serial.

Për shembull, psikologia Lorela Garuli është shprehur në një dalje televizive se problematikat kryesore të këtij seriali janë mesazhi që përcjell te fëmijët dhe dhuna që mbizotëron. Sipas saj, “Squid Game” nxit dehumanizimin dhe mëson fëmijët me parimin “qëllimi justifikon mjetin”, dhe nga ana tjetër ka shumë skena dhune, të cilat imitohen lehtësisht nga fëmijët.

Ndërkaq, mjekët kanë këshilluar prindërit që të mos i lejojnë fëmijët të shohin serialin, i cili debutoi në Netflix në shtator, është një dramë imagjinare e Koresë së Jugut, shkruan CNN.

Seriali përfshin disa garues të cilët janë në borxhe dhe luajnë një seri lojërash në përpjekje për të fituar para. Por, nëse konkurrentët humbasin, ata vriten.

Në disa raste, shkollat ​​kanë marrë masa kundër serialit dhe sfidave të tij. Një shkollë private në Roswell, Georgia, ndaloi çdo diskutim rreth serialit dhe sfidave.

Në Angli, ekipi i arsimit nga këshilli i Bedfordshire rekomandoi prindërit të mos lejojnë fëmijët të shikojnë serialin pas raportimeve se fëmijët po imitonin lojërat që shihnin aty.