Dalja e mekoniumit (feçet e para të bebes) brenda 8 orëve të para pas lindjes është një tregues i mirë i ushqyerjes së duhur të fëmijës me kulloshtrën e nënës. Me kalimin e ditëve mekoniumi do të zëvendësohet me feçen e vërtetë, dhe pamja do të jetë e ndryshme duke qënë se edhe qumështi ndryshon, pra nga kulloshtër kthehet në qumështin e maturuar. Feçet tani do të kenë një ngjyrë të artë.
Sa shpesh duhet të defekojë fëmija?
Gjatë ditëve të para, kur qumështi vërtetë nuk ka ardhur ende, fëmija mund të defekoj 1-2 herë në ditë, si edhe 3-4 bebelina të lagura me urinë. Pasi qumështi i vërtetë vjen, bebelinat e lagura do të jenë 5-6 dhe fëmija do të defekojë të paktën 3-4 herë në ditë.
Feçet e fëmijës që ushqehet me gji do të jenë të buta dhe me disa kokrriza, si edhe me një aromë jo të keqe. Deri në javën e 6 fëmija do të stimulohet të defekojë gati pas çdo pirje, dhe një fëmijë që ndjek këtë rregull është duke u ushqyer në mënyrën e duhur. Megjithatë njihen edhe raste kur fëmija rritet mirë edhe pse nuk lag apo bën pisë kaq bebelina. Pas javës së 6 fëmija do të defekojë më pak. Tek bebet që ushqehen me gji nuk duhet të mendoni se vuajnë nga konstipacioni nëse feçet janë të buta, të bollshme dhe pa dhimbje barku. Nëse fëmija shfaq vështirësi në defekim mund ta ulni në një legen me ujë të ngrohtë duke e mbajtur nga trupi dhe ta masazhoni lehtë në anus.