Qumështi i gjirit, ushqimi më i mirë për fëmijën!

• Është e vërtetë që ka disa lloje qumështi?

Po, në varësi të fazës së laktacionit. Ai ndryshon sipas moshës, gjendjes shëndetësore të fëmijës, momenteve të një vakti.

• Cilat janë fazat e laktacionit?

Kulloshtra: qumështi që del nga gjiri në ditët 1-7 pas lindjes. Është  i pasur me proteina, pak yndyrë dhe shumë antikorpe.

Qumështi i tranzicionit: është ai që prodhohet pas kulloshtrës dhe para qumështit të maturuar. Prodhohet nga dita 8-20.

Qumështi i maturuar: prodhohet nga dita 20 dhe ka sasi të ndryshme të yndyrës, e cila ndikon edhe në ecurinë e peshës së fëmijës. Ai përmban shumë elementë të rëndësishëm.

• Nga çfarë përbëhet qumështi i gjirit?

Ai përbëhet nga: uji, proteinat, yndyrnat, karbohidratet, mineralet, vitaminat. Ai gjithashtu përbëhet edhe nga përbërës jo ushqyes si: faktorët anti-mikrobialë, enzimat tretëse, hormone dhe disa faktorë të rëndësishëm për rritjen dhe mbrojtjen ndaj disa infeksioneve dhe sëmundjeve.

• Për sa kohë fëmija duhet të ushqehet vetëm me qumësht gjiri?

Deri në muajin e 6. Deri në këtë moment fëmija nuk ka nevojë për asnjë ushqim tjetër.

• Sa kohë duhet të ushqej me gji?

Edhe pasi fëmija ushqehet me ushqime të ngurta, qumështi i gjirit është shumë i rëndësishëm. Ai i jep fëmijës përbërës shumë të rëndësishëm që ndikojnë në rritje deri në moshën 2 vjeçare.

Lexo edhe: Si te rrisim qumeshtin e gjirit nepermjet ushqimit?